Icelandic
Birt: 2019-04-25 19:58:05 CEST
Sýn hf.
Breyting á stjórn/framkvæmdastjórn/endurskoðendum

Sýn hf. : Ráðning forstjóra - breytingar á stjórn

Heiðar Guðjónsson, stjórnarformaður Sýnar hf., hefur ákveðið að segja sig úr stjórn félagsins. Hjörleifur Pálsson hefur tekið við stjórnarformennsku og Sigríður Vala Halldórsdóttir varastjórnarmaður tekið sæti í stjórn. Samhliða þessum breytingum hefur verið gengið frá ráðningu Heiðars Guðjónssonar sem forstjóra Sýnar hf.

Hjörleifur Pálsson, stjórnarformaður Sýnar: "Heiðar hefur stýrt stjórnarstörfum undanfarin ár af röggsemi. Það er mikill fengur af því að fá hann til þess að leiða daglegan rekstur félagsins, enda hefur hann yfirgripsmikla þekkingu á starfseminni. Við bjóðum hann því velkominn til starfa á nýjum vettvangi."

Heiðar Guðjónsson, forstjóri Sýnar: "Ég er þakklátur fyrir það traust sem mér er sýnt með þessari ráðningu. Framundan eru krefjandi verkefni, sem ég hlakka til að leysa af hendi í samstarfi við allt það framúrskarandi fólk sem starfar hjá Sýn hf."