Tilkynning um undirritun Regins hf. á kaupsamningi um kaup á öllu hlutafé í Klasa fasteignum ehf.
Undirritaður hefur verið kaupsamningur milli Regins hf. og eigenda fasteignafélagsins Klasa fasteigna ehf. um sölu á öllum hlutum í félaginu til Regins hf. Undirritun kaupsamningsins er gerð í kjölfar áreiðanleikakönnunar sem nú er lokið. Sömuleiðis hefur helsti lánveitandi Klasa fasteigna ehf., KLS1, fagfjárfestasjóður í vörslu Stefnis hf. staðfest að sjóðurinn muni ekki nýta sér gjaldfellingarheimild vegna eigendaskipta á félaginu.
Kaupsamningurinn er með fyrirvara um samþykki Samkeppniseftirlitsins og að hluthafafundur Regins hf. samþykki heimild til stjórnar Regins hf. til útgáfu nýrra hluta og að hluthafar Regins hf. falli frá forgangsrétti til hinna nýju hluta. Hluthafafundur verður boðaður á nýju ári og er stefnt að því að hann verði haldinn í byrjun febrúar.
Kaupin á félaginu miðast við að heildarvirði Klasa fasteigna ehf. sé 8.250 m.kr. og að greitt verði fyrir eignarhluti í félaginu með hlutafé í Regin hf. að nafnverði 128.700.000 kr. auk peningagreiðslu eftir að tekið hefur verið tillit til áhvílandi skulda. Nýtt hlutafé í Regin hf., sem sérstaklega verður gefið út vegna kaupanna, miðast við fast gengi 13,63 krónur á hlut sem var lokagengi þann 15. nóvember sl. í Kauphöll.
Fjárhagsstaða Klasa fasteigna ehf. er sterk, útleiguhlutfall er hátt og leigutekjur góðar eða yfir 700 m.kr á ársgrundvelli. Fasteignasafn Klasa fasteigna ehf., sem Reginn hf. eignast, telur 9 fasteignir og er heildarfermetrafjöldi fasteignasafnsins um 28.500 fermetrar. Fasteignirnar eru eftirfarandi:
Skútuvogur 2, Bíldshöfði 9 (7. hæð), Síðumúli 7-9 (hluti), Síðumúli 28, Guðríðarstígur 6-8 og Hádegismóar 4, allar staðsettar í Reykjavík.
Litlatún 3 og Garðatorg 1 í Garðabæ.
Eyrartröð 2a í Hafnafirði.
Leigutakar eru um 30 talsins. Helstu leigutakar eru Vodafone, Hagkaup, Árvakur, Garðabær og Víðir. Safnið er einkar glæsilegt og vel við haldið og eignirnar sem um er að ræða eru allar í 100% eigu félagsins utan Síðumúla 7-9 og Bíldshöfða 9.
Ráðgjafi Regins hf. í viðskiptum þessum er Fyrirtækjaráðgjöf Landsbankans og ráðgjafi Klasa fasteigna ehf. er Arctica Finance.
Nánari kynning á viðskiptunum og áhrifa þeirra á rekstur Regins hf. verður send út í kjölfar boðunar til hluthafafundar.
Nánari upplýsingar veitir:
Helgi S. Gunnarsson
Forstjóri Regins hf.
S: 512 8900 / 899 6262
|